“O bellixeddu, nosu seusu is meris de sa Sardegna”: risposta a Bologna

La lettera aperta tutta in sardo di Albino Agus al turista bolognese che voleva la spiaggia di Villasimius senza i sardi: leggete la risposta ironica e graffiante


Per le ultime notizie entra nel nostro canale Whatsapp

di Albino Agus

O bellixèddu! Arregodadì ca tui innoi sesi stràngiu. Tui se’ bènniu a fai ‘s fariasa in Sardegna ca e’ sa terra hosta. Nosu seusu i’ mèrisi de sa Sardegna e de tottu su chi in Sardegna ddu i esti; quindi su mari puru: su mari de sa sardegna esti su mari hostu. Tui dèpisi pagai po ‘enni a ti sciùndi in su mari de sa Sardegna; ma non nosu sadrusu”. Sa tassa dda dèpinti fai pagai a tui dogna ‘otta chi pòhisi pei fòrasa de sa struttura in cantu asi prenotau po fai is ferias tuasa. E ses’andau in d’uhu de cùssus’ muncodòrisi de Sardegna chi, cùssusu chi cumàndanta, anti hèndiu e anti permìttiu a genti comente a tui, chi pàganta prusu de milla eurusu fetti po drommìri po dònnia hotti chi ddu i abàrranta; sentz’ ‘e contai su chi ti faìnti spendi po pappai.

O bellixèddu, tui turista sesi. In s’albergu a cincu stellasa chi ti mùngidi, tui tèhisi tottu: s’apposèntu, su ristoranti e medas’atras cosasa. E tra is atras cosasa, tehisi puru sa spiaggia e su mari in cantu ti podisi ponni a moddi brent’ a susu. E podisi tenni tottu su chi ‘ohisi: paghendi, agattasa puru genti chi ti hìngidi de cònca a pèisi.

Ingùi tui sesi su sennòri Pinco Pallino; e tui crèisi,  pomòri de tottu su chi ti fàinti pagai, de essi diventàu su meri de tottu sa Sardegna? E po essi liberu de fai is cosas tuasa, sentza de essi biu de hisciuhusu, in c’ias’ a bolli ‘ogai i’ sadrusu de sa Sardegna? Mancài, datu ca, segùndu tui, sèusu genti motta de famihi chi àspettanta s’ahimusiha tua po pappai, ias’ a bolli fai pagai sa tassa a i sadrusu chi si permìttinti de andài in cussa spiaggia bella chi tui asi sceddàu, po passai uha bella giornada, in cantu ias’a bolli essi sohu, mancai spollincu che bremi, po fai su proccu cun sa picciocca tua.

O bellixeddu, ascutta behi: mancài tui pèntzisi ca hosu sadrusu seusu de uha razza inferiori a sa tua e ca seusu genti motta de fàmmihi ca aspèttada s’ahimusiha tua po pappai uh’arrogu de pahi e tammattasa, ti sesi sbagliau.

De su hihàri chi pagasa tui, po ‘enni in Sardegna, non di benefìcianta nè i sadrusu nè sa Sardegna.

Cussu hihari abàrrada in i’ buxiàccasa de cussusu chi anti comprau “muncodòrisi” de Sardegna in cantu anti costruìu albergusu a cincu stellasa po ospitai genti, comente a tui, ca spendèndi milla eurusi a notti fetti po drommìri pigànta a i sciàffusu sa poborèsa.

Tui dèpisi sciri, si non ses’ tontu, ca candu ‘n  di ‘èssisi de sa struttura a cincu stellasa, in cantu sesi tzrebìu e riverìu, in cantu nosu, “sadrusu”, podeus’ intrai fetti po sciacquai ‘s peisi a genti comente a tui, tui sesi tale e quale a mei. Immagihadì aintru de su baùllu: deu pòburu e tui arrìccu, tott’ a i dusu stèndiusu brent’ a susu, tott’ a i’ dusu spollìncusu che bremi. S’unica differenza adessi ca tui, ca sesi pru’ grassu, po ita ca asi pappau de prusu, as’ a pudèsci pru’ de mei ca seu prusu stasìu.

Sa tessera chi t’a’ dohàu s’albergu po torrài a intrai candu ‘èssisi, in forasa de ingùi non bahi’ nudda; e non ti ‘òhada nisciuhu dirittu in prusu de su chi tehidi su pastori chi bividi in sa barracca a s’atra patti de sa strada.

Tui e deu, mancai uhu attesu de s’aturu, podeus’ andai a cantu si praxidi. Punta Molentis praxidi a mei puru; e ddu i andu mancai ddu i siasa tui  ca, pomori de is ariasa chi ti ‘òhasa, non mi praxisi.

Tui hàrasa ca hosu seu’ selvaggiusu po ita si pottàusu su prangiu a segusu e si poheusu a pappai in sa spiaggia.

Castia ca ddu pòdisi fai tui puru; bàstada chi a pusti prangiu arregòllasa tottu s’àhiga chi faisi e no dda ‘èssisi fuhiàda in sa spiaggia, ca tantu ‘n ci funti i’ selvaggiusu po dd’arregolli; po ita ca tui pagasa… 

Sa tessera de s’albergu non ti tzrebidi: e’ troppu tostada.

Nàra, chi non ti pràxinti i sadrusu, po ita no abàrrasa in bidda tua e ‘àndasa a ti fai su bagniu in cussu mari cohori caffellatti chi ddu i tehisi?

Ti fai ferehu a pentzai ca uhu populu selvaggiu e incivili, creisi tui, deppa’ tenni uhu mari bellu aicci! E ita ‘n di hàrasa? Atru che Maldive!!!

Po dd’accabài ti ‘òllu ‘ohài hu contzillu: ciccadì e ascutta sa cantzohi de Claudia Aru, ca, in Costa Smerala a Porto Cervo, adi scrittu e dedicau a tottu’ ‘s turistasa comente a tui: “B’ACAGAI”


In questo articolo: